السلام عليكم ورحمه الله وبركاته

باذن الله هيكون فى موضوعات جديدة كتير جدا الفترة القادمة .. انتظرونى

أجمل وصفة لتغير اليدين 180 وتحدى فى شهر

السلام عليكم ورحمة الله وبركاته

اولا هقول كلمتين بأختصار 

البنت الجميلة بتتعرف من جمال ايديها ورجليها من نظافتهم واهتمامك بيهم اى حد هيشوفك هيعرف انك بتهتمى بنفسك والعكس صحيح

الخلطة دى عرفتها بالصدفة من صحبيتى الجميلة  بوسى وقالت انها غيرت ايديها 180 درجة 

بتشيل البقع والخطوط الرفيعة وبتنعم الجلد اوى وبطريه وبتحافظ على الضوافر وبتمنع تكون جلد ميت حولين الاظافر

يعنى من الأخر وصفة لكل حاجة 

بس اهم حاجة الأستمرار والنتيجة هتبان بعد اول شهر استخدام 

ونصيحة العناية باليدين بالذات مينفعش نستمر شهر وتوقفى لا لازم الاستمرار مدى الحياة 

نيجى بقى للوصفة 

هى ممكن يكون ناس كتير عرفاها وناس كتير جربتها بس بجد تستحق التجربة 

اولا هتحضرى الحاجات دى 

دى المكونات الاساسية

1_ كريم جليسوليد الغنى عن التعريف طبعا كلنا تقريبا جربناه هو تقيل ولازم يتخفف فالغالب بيتخفف باليمون لان الليمون محارب البقع وبيفتح البشرة وبيحارب علامات تقدم العمر ومتوفر فى كل بيت ورخيص جدا

2_ فازلين طبعا غنى عن التعريف

3_ جلسرين من الصيدلية 

4_ ماء ورد اى نوع عندك

5_ زيوت ودى اختيارى ممكن زيت ( زيتون او لوز حلو او جنين القمح )

6_ كبسولات فيتامين e من الصيدلية

7_ وده اختيارى عشان المفعول يبقى اقوى فى التفتيح لوعندك اى كريم تفتيح مفعولة بطىء او مش بتستخدمية او اى كريم فاضل فيه شويه ممكن تضيفيه للمكونات 

انا كان عندى كريم التفتيح من برج ضفتة للوصفة 

ودى صورتة 

الطريقة 

هنجيب اى وعاء فاضى ويفضل زجاج عشان ميتفاعلش مع المكونات زى ده 

وهنبدأ بوضع المكونات 

الجليسوليد ومعاه عصير  نص ليمونه (( بعتذر مصورتش الليمون ))

وفايدة الليمون هنا التفتيح وكمان حفظ الخلطة اطول وقت ممكن

و كريم التفتيح لو موجود

و الفازلين بالحجم اللى تحبيه بس انصحك متكتريش 

وماء الورد بس مش كتير يعنى ربع كوب صغير

وفضى حوالى 2 او 3 كبسولات فيتامين e

والجلسرين نص الزجاجة اللى فى الصورة

والزيت النوع اللى تفضليه مجرد ملعقتين كبيرة 

وبعد اضافة المكونات تسيحيها على حمام مائى (( اى وعاء فيه ماء مغلى وتضعى الوعاء بالمكونات عليه وتستمرى بالتقليب حتى تجدى كل المكونات بقت بالشكل ده ))

وبعد كدا هتكونى محضرة العلبة اللى هتحفظى فيها الخلطة ويفضل زجاج وبخاخ كحول عشان تعقمى العلبة بتاعتك عشان الجراثيم والميكروبات وده شكل الكحول 

وبعد كدا تفضى المكونات كلها فى العلبة وتقفليها

وتستخدميها كل يوم باليل مره او مرتين بلاش بالنهار نهااااااائى لانها ممكن تقلب بنتيجة عكسية 

لان من مكونتها الجلسرين والزيوت والمكونات دى بتتفاعل بالنهار وبتسمر البشرة ومتسمعيش كلام اى حد يقولك على وصفة طبيعية من مكونتها الجلسرين او زيوت تستخدميها بالنهار عشان متقلبش معاكى بنتيجة عكسية 

استمرى على الخلطة دى ويفضل قبلها تعملى سنفرة بأى سنفرة للبشرة عندك يوم ويوم لنتيجة افضل 

وتحدى ايديكى هتتغير 180 درجة 

اسهل واسرع طريقة لتبيض اى منطقة فى الجسم (الاسكينول) | ESKINOL

السلام عليكم ورحمة الله وبركاتة

اهلا بيكم متبعاتى الجميلات 

طبعا انا عملت فكرة فيديو رفيو عن منتج او اتنين كل يومين واللى فى ناس كتير حبت الفكرة الحمدلله وفى ناس للاسف مش بتعرف تتفرج على فيديوهات عشان بتفتح من باقات نت من الموبايل فحبيت انى اعمل نفس الفكرة هنا فى المدونة ان نفس الفيديو هنزلة كتابة بعد نزول الفيديو بيومين او 3 ايام علشان اقدر بس الاقى وقت اكتب فيه وفكرة المدونة ليه عملتها ؟؟ لحفظ حقوق النشر باسمى 

اول منتج هو الاسكينول الغنى عن التعريف ورغم كدا فى ناس كتير جدا متعرفوش لانه مش موجود فى مصر 

ودى صورتة 

هو زجاجة بلاستيك شفافة وجوها سائل يشبة المايه 

حجم الزجاجة 225 ملى 

يوجد منه انواع كتير (بالخيار_والبابايا_والليمون)

وفى منه نوعين نوع فلبينى اصلى مكتوب عليه من ورا بالانجلش فقط 

ونوع اماراتى مكتوب عليه من ورا بالعربى عادى 

انهى الاصلى ؟؟

النوع الفلبينى لان نسبة الكحول فيه قليلة جدا وبالتالى مش هيأثر على الجلد 

طيب ايه هو الاسكينول ؟؟

هو عبارة عن غسول او تونر او منظف يعنى ليه اسامى كتير والافضل منظف لانة بينظف الجلد بطريقة حلوة جداااا

طيب ايه افضل نوع للتفتيح ؟؟

اللى باليمون لاننا عارفين طبعا قدرة الليمون على محاربة البقع الداكنة 

طريقة استخدامة ؟؟

اولا انا مبنصحش تستعملية لوشك لانة قوى جداااا وخصوصا نسبة الكحول فيه عالية زى مقولت وممكن يسببلك مشاكل

بنصح بية للجسم فقط وتقدرى تستخدمية فى اى مكان غامق عندك (الابط_الاماكن الحساسة_الكوع_الركبة_والرقبة )

بتجيبى قطنة وتاخدى من الاسكينول شوية وتمسحى بيه المكان كويس جدا وهتشوفى لون القطنة بقى ازاى

طيب بنغسلة ؟؟

لا مش بيتغسل يعنى تقدرى تستعملى اى كريم او تركيبة او خلطة بعديه على طول

استخدمة كام مرة فى اليوم؟؟

على حسب ممكن مرة او اتنين

بيفتح فعلا ؟؟

ايوة جدا مع الاستمرار يعنى من شهر ل 3 شهور هتلاحظى تأثير كويس جدااا 

بيتباع فين ؟؟

موجود فى السعودية والخليج كله

بس مش موجود فى مصر

  

طيب اجيبة ازاى ؟؟

تقدرى تجبية من اى بيدج على الفيسبوك او صفحة بتبيع منتجات الخليج فى مصر 

لو فى اى استفسار سبيلى كومنت تحت هنا او على جروب الفيس او الصفحة او انستجرام او اى مكان وهرد عليكى

وده الفيديو لو انتى زائرة جديدة

مع السلامة

حل مشاكل المنطقة الحساسة فى شهر

السلام عليكم

مين من البنات القمرات او الستات مش بيعانى من غمقان فى المنطقة الحساسة !! طبعا مفيش

لان طبيعة المكان ده اصلا اغمق من لون الجسم وعشان كلنا بنعانى من مشاكل دايما فى المكان ده

حبيت اقولكم عن خلطة كريمات طبية هتساعد على الحد من مشاكل المكان ده واللى اكترها بتكون التهابات نتيجة استخدام الفوط الصحية زى الويز ((المفروض تستخدمى فوط قطن 100%))

طيب تعرفى منين انك عندك التهابات ؟؟ من الرائحة الكريهه والهرش ((انك دايما عايزة تهرشى فى المكان ده بأستمرار))

وكمان الالتهابات بتغمق المنطقة دى يعنى واحده ممكن تكون بتستعمل كريم تفتيح نضيف جدا بس مش بتفتح ليه ؟؟

لان عندها التهابات لازم تتعالج الاول والدكاترة الشاطرة لما بتروحلهم اول حاجة بيكتبوها كريم مضاد للالتهابات لمدة شهر وبعد كدا بيكتب كريم التفتيح

يبقى اول حاجة لو محتاجة تهتمى بالمنطقة دى لازم تستعملى كريم مضاض للالتهابات لمدة شهر تقريبا 

وبعد كدا تبدأى فى العلاج والاهتمام بقى على نضافة مع العلم انك لو مستعملتيش فوط قطن ونشفتى المكان كويس جدا بعد كل حمام 

وحرصتى على ترطيب المكان والتهويه ممكن الالتهابات ترجع تانى فالوقاية افضل من العلاج

يبقى اول خطوة للناس اللى عندها التهابات بالفعل 

هى تركيبة الكريمات دى ((والتركيبة بتحتوى على كريم فيه كورتيزون والكورتيزون هنا مش غلط لان مفيش علاج تانى للالتهابات 

غير المادة دى ةاحنا هنستعملها شهر واحد فقط يبقى مش هيأثر علينا نهائى))

ايه هى التركيبة ؟؟

التركيبة مكونة من اهم كريمين لعلاج الالتهابات (( لاميزيل 1% وده اخترته يكون الكرتيزون فيه 1 فقط فى نوع تانى الكورتيزون فيه عالى مردتش استخدمة لان فى كريمات تانية فيها كورتيزون اما لو عايزة كريم واحد بس يبقى هاتيه وهو اسمه مش متذكراه لاكن كل الصيادلة عارفينة تقدرى تسئليهم عنه ))

(( كريم بيتاديرم طبعا غنى عن التعريف وسعره رخيص حوالى 3 جنية وفى ناس بتستعمله عمال على بطال للتفتيح وده غلط ارجوكى بلاش لان الكورتيزون غلط جدا استخدامة بأستمرار))

دول كريمات علاج الالتهابات 

طيب انا ضفت ايه بقى عشان النتيجة تبقى مرضية وابقى ضربت عصفورين بحجر واحد ضفت كريم تقشير

ليه كريم تقشير ؟؟

لان المفروض انك تعملى تقشير للمكان دة مرتين فى السنة كل مرة من شهر لشرين عشان تجددى خلايا الجلد وتشيلى اى جلد ميت ممكن يسبب سمار

طيب التقشير ده مش غلط ؟؟

لا مش غلط بالعكس فى امريكا والصين وغيرهم دايما بيقشروا جلدهم 

عدم تقشير الجلد بيخلى طبقات الجلد اللى مش صحية تتراكم فوق بعضها فاى كريم تستعملية مش بيمتص كويس لان طبقات الجلد 

الخارجية بتمنع امتصاصة علشان كدا خبراء التجميل بينصحوا انك تعملى صنفرة للجسم او الوش مرة واحدة على الاقل اسبوعيا

فمتقلقيش استخدمى الكريم المقشر زى متحبى فى منه انواع كتير وغالية لاكن انا بفضل اكرتين 50% سعرة 9 جنية ونتايجة رائعة

طيب كدا هتعالجى الالتهابات وهتقشرى الجلد عشان تحضرية للتفتيح بقى ؟؟ ايوه تمام بس مش لسه هستنى بقى شهر عشان ابدأ افتح 

كان عندى كريم مون لايت ده سعرة 49 جنية ضفته للتركيبة طيب ليه ؟؟

عشان اكسب وقت وكمان احس بنتيجة مرضية مع التقشير لان امتصاص كريم التفتيح هيبقى اقوى ونتيجتة اسرع

((ممكن تستخدمى اى كريم تفتيح عندك وافضلهم فالسوق دلوقتى ميلوكين بى 23 جنية فيه مادة الهايدروكينون ودى بتفتح بسرعة للعرايس اللى مستعجلين اوى ))

وضفت كمان كريم فيوسيدن ليه ؟؟

عشان يهدى الجلد اثناء التقشير والعلاج وكمان عشان لو طلع حباية مثلا او حاجة 

طريقة التركيبة 

هتجيبى علبة فاضية يفضل زجاج او برطمان زجاج فاضى وتغسليه كويس وتنشفيه وبعد كدا تجيبى كحول بخاخ وترشى على العلبة عشان تعقميها من اى مكروبات وهتلاقى الكحول رخيص جدا فى الصيدلية 

وبعد كدا تحطى الكريمات كلها على بعض ماعدا الفيدوسيدن هتحطى نص الامبوبة بس وتقلبيهم كويس 

وبس كدا 

يبقى كدا تركيبة لمدة شهر او لحد متخلص هتحل مشاكل كتير (( هتعالج الالتهابات وهتقشر الجلد الميت وهتعالج اى حبايه عندك او دمل وكمان هتفتح شويه ))

وبعد كدا هنبدأ فى تكملة التفتيح بتاعنا 

طريقة الاستخدام 

يوميا قبل النوم لحد الصبح 

وبالنهار تغسلى المكان كويس ممنوع تستخدمى الصابون العادى للمكان ده ((هتكلم عنه بعدين)) ممكن غسول نسائى مرتين بس فالاسبوع زى سيتال او كيرفرى 

وبعد كدا طول اليوم تستخدمى المرطب مرتين او 3 مرات وافضل مرطب للاماكن دى صودوكريم بحوالى 38 جنية او زنك اوليف ممتاز بردو بحوالى 12 جنية اللى يريحك استخدمية

وبعد متخلص التركيبة 

هنستمر على كريم تفتيح كويس مع الترطيب 

واوعدك خلال 3 شهور مش هتصدقى نفسك من النتيجة الكويسة اللى هتكونى وصلتلها 

بس اهم حاجة الالتزااااااام والمداومة وبلاش تكسلى 

واى استفسار سبيلى كومنت تحت وهرد عليكى 

طريقة:عمل كب كيك الكريسماس(على طريقتى)|How to Make Christmas Tree Cupcakes!

مشترياتى : خلال شهر ديسمبر (2) ♥♥ 2014 | Haul

الديرما رولر: طريقة الاستخدام وانواع الكريمات المستخدمة (الجزء التانى ) ...